Aal E Ahmad Suroor
khayal jin ka hamen roz-o-shab satata hai
kabhi unhen bhi hamara khayal aata hai
tumhara ishq jise khaak men milata hai
isi ki khaak se phir phuul bhi khilata hai
dhalegi raat to phailega nuur bhi is ka
charagh apna sar-e-sham jhilmilata hai
na tai hui tiri sham-e-jamal se bhi jo raah
vahin pe mera junun rasta dikhata hai
na jaane shauq ko aadat hai kyuun bahakne ki
tira hijab to be-shak adab sikhata hai
kahan bujhae se bujhte hain ishq ke shoale
charagh yuun to jo jalta hai bujh bhi jaata hai
ye bad-e-rah-e-guzar dar-khur-e-chaman na sahi
ghubar ka bhi thikana nikal hi aata hai
junun ki chaal pe thitki na vo nazar tanha
yahan zamana bhi qadmon men lot jaata hai
hai tere gham ki gham-e-rozgar se sazish
kahan kahan dil-e-divana kaam aata hai
‘surur’ jins-e-vafa bechte nahin phirte
jigar ke daagh dikhana to sab ko aata hai
Leave a Reply