jo us ke samne mera ye haal aa jaa.e
to dukh se aur bhi us par jamal aa jaa.e
mira ḳhayal bhi ghungru pahan ke nachega
agar ḳhayal ko tera ḳhayal aa jaa.e
har ek shaam na.e ḳhvab us pe kaḌenge
hamare haath agar teri shaal aa jaa.e
inhi dinon vo mire saath chaa.e piita tha
kahin se kaash mira pichhla saal aa jaa.e
main apne gham ke ḳhazane kahan chhupa.unga
agar kahin se koi indimal aa jaa.e
har ek baar na.e Dhang se saja.en tujhe
hamare haath jo phulon ki Daal aa jaa.e
ye Dubta hua suraj Thahar na jaa.e ‘vasi’
agar vo samne vaqt-e-zaval aa jaa.e
Leave a Reply