sach bolne ke jurm men neze pe sar raha
qatil ba-izz-o-jah bhi na-mo’tabar raha
kya barish-e-bala thi ki sab kuchh baha ga.i
achchha hua malang be-divar-o-dar raha
yarab ḳhata muaaf kahan DhunDhta tujhe
main apni hi talash men sham-o-sahar raha
azad ho chuka tha qafas se to kya hua
uḌta kahan parind jo be-bal-o-par raha
charon disha thi ‘shams’ amavas khaḌi hui
bhiga shajar udaas magar raat bhar raha
Leave a Reply