Sach Bolne Ke Jurm Mein Neze Pe Sar Raha

sach bolne ke jurm meñ neze pe sar rahā

qātil ba-izz-o-jāh bhī nā-mo’tabar rahā

kyā bārish-e-balā thī ki sab kuchh bahā ga.ī

achchhā huā malang be-dīvār-o-dar rahā

yārab ḳhatā muaaf kahāñ DhūñDhtā tujhe

maiñ apnī hī talāsh meñ shām-o-sahar rahā

āzād ho chukā thā qafas se to kyā huā

uḌtā kahāñ parind jo be-bāl-o-par rahā

chāroñ dishā thī ‘shams’ amāvas khaḌī huī

bhīgā shajar udaas magar raat bhar rahā

Leave a Comment