tire huzur agar mujh men ajizi na rahe
main ro paḌun mire honTon pe ye hansi na rahe
the aap paas to phir bhi tha ḳhali-pan koi
aur aj-kal to mire paas aap bhi na rahe
ḳhushi ki rut men koi hansne vaala mil na saka
hamari maut ke mauqe pe matami na rahe
mire ḳhayal men mahshar ki ik alamat hai
qalam ka qaht paḌe ghar men Diary na rahe
kuchh aise rang se tartib de zamane ko
ḳhushi rivaj ho iḳhlas ki kami na rahe
vaba ka ḳhauf hai aisa ki ḳhana-e-rab men
parinde dekhe ga.e aur aadmi na rahe
tumhara mujh se bichhaḌna bhi aise hai ‘abdul’
ki jaise qaht ke mausam men naukri na rahe
Leave a Reply