Yazdani Jalandhari
suraj ke saath saath ubhare ga.e hain ham
tarikiyon men phir bhi utare ga.e hain ham
raas aa saki na ham ko hava tere shahr ki
yuun to qadam qadam pe sanvare ga.e hain ham
kuchh qahqahon ke abr-e-ravan ne diya nikhar
kuchh gham ki dhuup se bhi nikhare ga.e hain ham
sahil se rabta hain nahin TuTta kabhi
kaise samundaron men utare ga.e hain ham
TuuTa na rah-e-shauq men afsun-e-tirgi
le kar jilau men chand sitare ga.e hain ham
jaana muhal tha tiri mahfil ko chhoḌ kar
pa kar tiri nazar ke ishare ga.e hain ham
is tiira ḳhak-dan men koi puchhta nahin
kahne ko asman se utare ga.e hain ham
sau baar bar-e-gham ne pareshan kiya hamen
sau baar misl-e-zulf sanvare ga.e hain ham
is silsile men maut to badnam hai yunhi
is zindagi ke hathon hi maare ga.e hain ham
gardab-e-gham men Duub ke ubhre hain barha
kis ne kaha kinare kinare ga.e hain ham
‘yazdani’-e-hazin hamen kuchh bhi ḳhabar nahin
us astan pe kis ke sahare ga.e hain ham
Leave a Reply