tire ḳhayal ka kuchh bhi pata nahin paḌta
yahan to charon taraf da.era nahin paḌta
ham ehtiyat se ḳhvabon ko maar dete agar
hamari aankh men ye aabla nahin paḌta
ajiib raah paḌi hai ki is ke aage ab
kisi bhi samt koi rasta nahin paḌta
hamare ḳhvab ki ta.abir ho ga.i hoti
kisi men aur koi sochna nahin paḌta
vo rah-e-ishq men daḳhil nahin hue honge
jo bolte hain vahan hadisa nahin paḌta
girah to roz hi paḌ jaati hai ḳhayalon men
mire mizaj ka par zaviya nahin paḌta
tamam umr tumhin tum likhe ga.e hote
hamari soch men gar hashiya nahin paḌta
Leave a Reply