aaj barson men to qismat se mulaqat hui
aap munh pher ke baiThe hain ye kya baat hui
uḌ ga.i ḳhak-e-dil-o-jan to vo rone baiThe
bastiyan jal ga.iin jab TuuT ke barsat hui
tum mire saath the jab tak to safar raushan tha
sham.a jis moḌ pe chhuTi hai vahin raat hui
is mohabbat se mila hai vo sitamgar ham se
jitne shikve na hue utni mudarat hui
ek lamha tha ajab us ki shanasa.i ka
kitne nadida zamanon se mulaqat hui
qatl ho jaati hai is daur men dil ki avaz
mujh pe talvar na TuuTi ye karamat hui
gaanv ke gaanv bujhane ko hava aa.i thi
mere ma.asum charaghon se shuruat hui
sha.eri pahle rasulon ki dua thi ‘qaisar’
aaj is ahd men ik sho.abda-e-zat hui
Leave a Reply