Poet
zindagi karvaTen badalti hai
aa bhi jaao ki raat Dhalti hai
sub.h-e-nau ki hasin imarat men
raat ki tirgi machalti hai
zindagi kitne mah-o-sal ke ba.ad
ab zara paanv paanv chalti hai
ham tahi-ḳhvab hain to kya dil men
ḳhvab ki aarzu to palti hai
chand lafzon ka zalzala hai magar
dil ki buniyad tak dahalti hai
ham koi teri vo nazar to nahin
baton baton men jo badalti hai
aao kuchh der senk len ankhen
koi duniya-e-shauq jalti hai
kis ki aahaT ka shor hai ‘nazim’
naghmagi si faza men Dhalti hai
Leave a Reply