Poet
ham khizan ki agar khabar rakhte
ashiyane men phuul bhar rakhte
ham agar ishq men asar rakhte
amradon ko ghulam kar rakhte
mere dil ko samajhte arsh-e-barin
ye sitare agar nazar rakhte
kya khabar thi ki daam hai vo zulf
ham bhi faulad ka jigar rakhte
saath rang-e-chaman ke ud jaate
aaj ham bhi jo bal-o-par rakhte
raah deta jo us ke aane ki
zaagh ke aage ham jigar rakhte
yaar ki donon ankhen qatil thiin
ik nazar ham kidhar kidhar rakhte
bhed apna diya na us dil ne
ham bhi kuchh apni fikr kar rakhte
yahi shikva hai be-vafaon se
ham na marte jo ye khabar rakhte
sang-e-dil tujh ko jante ham agar
sabr ki sil kaleje par rakhte
gundhte vo khajur se juute aaj
haath apne jo kuchh hunar rakhte
ankhen ro ro ke kyuun sajate ho
‘bahr’ aansu nahin asar rakhte
Leave a Reply