raah bhatka hua insan nazar aata hai
teri ankhon men to tufan nazar aata hai
paas se dekho to maalum padega tum ko
kaam bas duur se asan nazar aata hai
is ko maalum nahin apne vatan ki sarhad
ye parinda abhi nadan nazar aata hai
bas vahi bhumi pe insan hai kahne laaeq
jis ko har shakhs men bhagvan nazar aata hai
aai jis roz se beti pe javani us ki
baap har vaqt pareshan nazar aata hai
jab se tum chhod gae mujh ko akela ‘amabar’
shahr saara mujhe viran nazar aata hai
Leave a Reply