hansa tha do-ghaḌi barson magar aansu bahaya tha
main jab chhoTa tha ik laḌki se main ne dil lagaya tha
mire pairon ke niche ki zamin banjar thi kuchh itni
saba ne ek gul kitne zamane men khilaya tha
sulagti dhuup men socho safar kaise kaTa hoga
miri manzil thi kya aur tum ne kya rasta dikhaya tha
mohabbat aag hai aisi jo paani se nahin bujhti
zamane ne abas sho.ale ko muTThi men dabaya tha
main ḳhud mahsus karta huun ki ab azad huun main bhi
ki pinjra khol kar main ne parindon ko uḌaya tha
mire hathon pe sukhe phuul ki kuchh pattiyan rakh kar
bichhaḌte vaqt us ne mujh ko siine se lagaya tha
Leave a Reply