Na Guman Rahne Diya Hai Na Yaqin Rahne Diya

Zafar Iqbal

na guman rahne diya hai na yaqin rahne diya

rasta koi khula ham ne nahin rahne diya

us ne TukḌon men bikhera hua tha mujh ko jahan

ja uThaya hai kahin se to kahin rahne diya

saj rahe the ye shab o roz kuchh aise tujh se

ham ko duniya hi pasand aa ga.i diin rahne diya

ḳhud to baghi hue ham tujh se magar saath hi saath

dil-e-rusva ko tire zer-e-nagin rahne diya

ja-ba-ja is men bhi tere hi nishan the shamil

ham ne ik naqsh agar apne ta.iin rahne diya

ik ḳhabar thi jise zahir na kiya ham ne kabhi

ik ḳhazana tha jise zer-e-zamin rahne diya

ḳhud to bahar hue ham ḳhana-e-dil se lekin

vo kisi ḳhvab men tha us ko yahin rahne diya

asman se kabhi ham ne bhi utara na use

aur us ne bhi hamen ḳhak-nashin rahne diya

ham ne chheḌa nahin ashya-e-mohabbat ko ‘zafar’

jo jahan par thi paḌi us ko vahin rahne diya