kab gavara hai mujhe aur kahin par chamke
mera suraj hai to phir meri zamin par chamke
kitne gulshan ki saje the mire iqrar ke naam
kitne ḳhanjar ki miri ek nahin par chamke
jis ne din bhar ki tamazat ko sameTa chup-chap
shab ko taare bhi usi dasht-nashin par chamke
ye tiri bazm ye ik silsila-e-nik.hat-o-nur
jitne tarik muqaddar the yahin par chamke
yuun bhi ho vasl ka suraj kabhi ubhre aur phir
sham-e-hijran tire ik ek makin par chamke
aankh ki zid hai ki palkon pe sitare TuTen
dil ki ḳhvahish ki har ik zaḳhm yahin par chamke
Leave a Reply