Sabir Waseem
khile hue hain phuul sitare dariya ke us paar
achchhe log base hain saare dariya ke us paar
mahki raten dost hava.en pichhli shab ka chand
rah ga.e sab ḳhush-ḳhvab nazare dariya ke us paar
bas ye soch ke sarshari hai ab bhi apne liye
bahte hain ḳhushbu ke dhare dariya ke us paar
shaam ko zindagi karne vaale rang-birange phuul
phuul vo saare rah ga.e pyare dariya ke us paar
yuun lagta hai jaise ab bhi rasta takte hain
ga.e zamane ret kinare dariya ke us paar
gunjti hai aur lauT aati hai apni hi avaz
aḳhir kab tak koi pukare dariya ke us paar
dahki hui ik aag hai ‘sabir’ apne siine men
jaate nahin par is ke sharare dariya ke us paar
Leave a Reply