Ki KHud-Numai Na Tashhir Chahte Hain Hum

Sohail Akhtar

ki ḳhud-numa.i na tash.hir chahte hain ham

bas apne hone ki tauqir chahte hain ham

riha.i ka yahi mafhum hai hamare liye

pasand ki koi zanjir chahte hain ham

ye dekhna hai ki raftar kar rahi hai kya

tamam shahr ko tasvir chahte hain ham

bahut udaas hai koi paḌos men yaaro

zara si jashn men taḳhir chahte hain ham

zara si baat jo chheḌi huquq ki ham ne

uTha ye shor ki jagir chahte hain ham

hamen banaya gaya hai hadaf ye jante hain

to kyuun nishane pe har tiir chahte hain ham

ye toḌ-phoḌ zarurat hai koi shauq nahin

na.e sire se jo ta.amir chahte hain ham

bas ek qafiya-paima.i ham ne ki hai ‘suhail’

so ai ghazal tiri ta.azir chahte hain ham