naf.a nuqsan dekha ja raha hai
mohabbat men bhi socha ja raha hai
ana.en rehn rakkhi ja rahi hain
ḳhudi ko aaj becha ja raha hai
miri ma.asum si kuchh ḳhvahishon ko
sar-e-bazar raunda ja raha hai
koi suraj sava neze pe la kar
miri himmat ko parkha ja raha hai
yahi kya kam hai teri ashiqi men
hamara naam likkha ja raha hai
mohabbat ki saza paa.i hai ‘da.em’
miri sanson ko roka ja raha hai
Leave a Reply