riyaz-khairabadi

Chhodti Hi Nahin Mujhko Shab-E-Furqat Meri

chhodti hi nahin mujh ko shab-e-furqat meri

ai men qurban use itni mohabbat meri

kyuun kar uupar uthen ankhen miri ai hasrat-e-did

sar uthane nahin deti hai nadamat meri

phuut kar rone se ashkon ka mara hai paani

be-bahar aae khuli jaati hai turbat meri

vasl ki shab vo Darate hain ye kah kah ke mujhe

tum satao tumhen kosegi nazakat meri

jalva-e-yar ne behosh kiya hai mujh ko

kuchh alag nashsha-e-mai se rahi ghaflat meri

aankh taron ne churai ye nai baat hai aaj

dekhiye katti hai kyuun kar shab-e-ghurbat meri

rahn-e-mai hone se bach jaae to izzat rah jaae

mol le le koi dastar-e-fazilat meri

rahen ta-hashr yunhi mehndi lage paanv ke naqsh

chaar phulon ki na mohtaj ho turbat meri

taare mujh ko nazar aaen na kahin hashr ke din

Dar se badh jaae na had se shab-e-furqat meri

chhed kar majma-e-zuhhad ko Darta huun ‘riyaz’

kohna masjid ki evaz ho na marammat meri

More Poems

Leave a Comment