Zafar Iqbal Zafar
labon par pyaas sab ke be-karan hai
har ik janib magar andha kuaan hai
hai koi aks-e-rangin aa.ine par
jab hi to aa.ine men kahkashan hai
juda.i ka na qissa vasl ka hai
adhuri kis qadar ye dastan hai
kisi se koi bhi milta nahin ab
har ik insan yahan to bad-guman hai
nahin kuchh bolte hain jabr sah kar
lage tarshi hui sab ki zaban hai
vatan men rah ke bhi hai be-vatan ye
bahut mazlum ye urdu zaban hai
kisi ka dard banTe gham men ro.e
‘zafar’ ehsas logon men kahan hai
Leave a Reply