har taraf husn hai javani hai
aaj ki raat kya suhani hai
reshmi jism sarsarate hain
marmarin khvab gungunate hain
dhadkanon men surur phaila hai
rang nazdik-o-dur phaila hai
davat-e-ishq de rahi hai faza
aaj ho ja kisi hasin pe fida
mohabbat bade kaam ki chiiz hai
mohabbat ke dam se hai duniya ki raunaq
mohabbat na hoti to kuchh bhi na hota
nazar aur dil ki panahon ki khatir
ye jannat na hoti to kuchh bhi na hota
kitabon men chhapte hain chahat ke qisse
haqiqat ki duniya men chahat nahin hai
zamane ke bazar men ye vo shai hai
ki jis ki kisi ko zarurat nahin hai
ye be-kar be-dam ki chiiz hai
mohabbat bade kaam ki chiiz hai
ye bas naam hi naam ki chiiz hai
mohabbat se itna khafa hone vaale
chal aa aaj tujh ko mohabbat sikha den
tira dil jo barson se viran pada hai
kisi nazninan ko is men basa den
mira mashvara kaam ki chiiz hai
Leave a Reply