charagh-e-zist ke donon sire jalao mat
agar jalao to lau is qadar baḌhao mat
is aarzu men ki zinda uTha liye jaao
ḳhud apne dosh pe apni salib uThao mat
sulag raha hai jo dil vo bhaḌak bhi sakta hai
qarib aao par itne qarib aao mat
jo zaḳhm khaa.e hain un ko sada aziiz rakho
jo tum ko bhuul gaya ho use bhulao mat
jahan men koi to ho e.atibar ke qabil
vafa-e-dost ko ab aur azmao mat
isi tarah se mili hai har ik ko dad-e-hunar
jo sang aa.e use chuum lo ganvao mat
Leave a Reply