Faza Ibn E Faizi
jur.at-e-iz.har se rokegi kya
maslahat mera qalam chhinegi kya
main musafir din ki jalti dhuup ka
raat mera dard pahchanegi kya
be-karan huun main samundar ki tarah
mauj-e-shabnam qad mira napegi kya
chal paḌa huun sar pe le kar asman
paanv ke niche zamin Thahregi kya
shahr-e-gul ki rahne vaali agahi
mire zaḳhmon ki zaban samjhegi kya
chehra chehra alm-e-be-chehragi
dekh kar bhi zindagi dekhegi kya
main to logo sah luun har patthar ka jabr
vaqt ki shishagari sochegi kya
hasraton ki aanch men is ko tapa
yuun badan ki tirgi pighlegi kya
nutq se lab tak hai sadiyon ka safar
ḳhamushi ye dukh bhala jhelegi kya
kya tavaqqo kor-zehnon se ‘faza’
ko.elon se raushni phuTegi kya
Leave a Reply