Syed Amin Ashraf
ajiib shai hai tarah-dar bhi tamanna bhi
raqib-e-jan bhi hai qatil bhi hai masiha bhi
udaas udaas harim-e-nigah be-manzar
dhuan dhuan ḳhalish-e-ra.egan se duniya bhi
dil-o-dimagh-o-nafas tishnagi se hain raushan
isi ki aag men jalte hain shahar-o-sahra bhi
vahi hava-e-jahan-tab mo’atabar hai ki jo
jila ke chhoḌ ga.i hai charagh-e-farda bhi
talab men mujh se to lamha bhi ik nahin kaTta
isi ḳhumar ne kaaTe hain koh-o-dariya bhi
tire ḳhayal se ḳhalvat bhi anjuman hai mujhe
tire ḳhayal se hon anjuman men tanha bhi
faza-e-ḳhvab-e-tarab ne jaga diya mujh ko
lagi jo aankh to hone laga savera bhi
Leave a Reply