aag barsi to bahut jal ke mare the patte
log kahte hain ki kasrat se hare the patte
kuchh havaon ki tarashon ne Dubo kar ḳhuun men
ja-ba-ja ḳhuub saliqe se dhare the patte
reshe-reshe men kahin zahr na bhar de shabnam
ham-nashinon se kabhi yuun na Dare the patte
zahira-shaiḳh zamir apna jala kar ḳhush thi
us ke anchal men karoḌon ke bhare the patte
barg-e-sarsabz ki shaḳhon men zamurrad the jaḌe
dast-e-kotah tha main mujh se pare the patte
taash ke khel men har faisla patton pe shahab
haar ya jiit ki donon men khare the patte
Leave a Reply