Uvais Girach
kabhi jo viraniyon men dekha ghana sa ik bhi shajar nahin hai
shajar bhi aise hain dekh rakkhe ki jis men koi samar nahin hai
sabhi nazare miri nazar men ghubar ban kar simaT ga.e hain
tujhe na aaya nazar to shayad nazar men teri asar nahin hai
ajiib hogi hava ki surat ghazab ki hogi hava ki rangat
tujhe bhi is ka pata nahin hai mujhe bhi is ki ḳhabar nahin hai
vo asman ka buland manzar ye farsh ki vus.aton ko dekho
yahan to sab kuchh bashar bashar hai vahan pe koi bashar nahin hai
ye meri ankhen hain in men dekho samundaron ki ravaniyan hain
tu dekh sakta inhen musalsal junun tujh men magar nahin hai
falak ke uupar hai chand raushan zamin par aftab raushan
falak ke upar shajar nahin hai zamin ke uupar qamar nahin hai
ka.i ujale hain din men rahte ka.i ujale hain shab ke andar
vo chand taare yahan nahin hai idhar jo hai vo udhar nahin hai
Leave a Reply