DhunDhta huun sar-e-sahra-e-tamanna ḳhud ko
main ki samjha tha kabhi ruh-e-tamasha ḳhud ko
apne bachchon ki taraf ghaur se jab bhi dekha
kitne hi rangon men bikhra hua paaya ḳhud ko
aur kuchh log mire saa.e tale susta len
girti divar huun deta huun sahara ḳhud ko
nuur tu mujh se faravan hua mahfil mahfil
gham nahin sham-e-sifat main ne jalaya ḳhud ko
reg-e-ummid ke shadab sarabon ke tufail
main ne dekha hai kabhi surat-e-sahra ḳhud ko
meri azmat ka nishan meri tabahi ki dalil
main ne halat ke sanche men na Dhala ḳhud ko
meri taḳhliq mire kaam na aa.i ‘arif’
main ba-andaz-e-ḳhuda paata huun tanha ḳhud ko
Leave a Reply