Poet
utren gahra.i men tab ḳhaak se paani aa.e
sab ko ai dost kahan ashk-fishani aa.e
phandni paḌ ga.i kanTon se bhari baaḌ hamen
jitne paigham the phulon ki zabani aa.e
bas yahi soch ke kirdar nibhate jaao
jaane kis moḌ pe anjam-e-kahani aa.e
ek muddat main ḳhamoshi se raha mahv-e-kalam
tab kahin ja ke ye lafzon men ma.ani aa.e
kahin dhoka hi na ho shauq na.i manzil ka
mere hamrah koi raah purani aa.e
‘shaz’ ḳhud men hi ganva.e hue ḳhud ko rakhna
haath jab tak na koi apni nishani aa.e
Leave a Reply