kam na thi sahra se kuchh bhi ḳhana-virani miri
main nikal aaya kahan ai vaa.e nadani miri
kya bana.un main kisi ko rahbar-e-mulk-e-adam
ai ḳhizr ye sar-zamin hai jani-pahchani miri
jaan o dil par jitne sadme hain isi ke dam se hain
zindagi hai fil-haqiqat dushman-e-jani miri
ibtida-e-ishq-e-gesu men na thiin ye uljhanen
baḌhte baḌhte baḌh ga.i aḳhir pareshani miri
dasht-e-hasti men ravan huun mudda.a kuchh bhi nahin
kab hui mohtaj-e-laila qais-samani miri
aur tu vaqif nahin koi dayar-e-ishq men
hai junun shaida mira vahshat hai divani miri
bagh-e-duniya men yunhi ro hans ke kaTun chaar din
zindagi hai shabnam o gul ki tarah faani miri
bad-e-tark-e-arzu baiTha huun kaisa mutma.in
ho ga.i asan har ik mushkil ba-asani miri
haan ḳhuda-lagti zara kah de tu ai husn-e-sanam
ashiqi auron ki achchhi ya ki hairani miri
laḳht-e-dil khane ko hai ḳhun-e-jigar piine ko hai
mezban-e-dahr ne ki ḳhuub mehmani miri
naghma-zan sahra men ho jis tarah koi andalib
yuun hai ai ‘mahrum’ sarhad men ghazal-ḳhvani miri
Leave a Reply