Ishq Ki Shoala-Mizaji KHud Hi Barsati Hai Aag

Mushir Jhanjhanvi

ishq ki sho.ala-mizaji ḳhud hi barsati hai aag

baans ke jangal men apne-ap lag jaati hai aag

jaan lene ke tariqe kis qadar dilchasp hain

zahr barsati hai shabnam phuul barsati hai aag

harf jab aata hai namus-o-vaqar-e-ishq par

shiddat-e-ehsas se rag rag men lahrati hai aag

na-muvafiq daur men apne bhi ho jaate hain ghair

ḳhushk mausam ho to divaron men lag jaati hai aag

dekhne vaale zara nazdik ja kar dekhte

duur se ḳhush-rang ḳhush-paikar nazar aati hai aag

atish-e-jazbat se raushan he duniya-e-‘mushir’

jism ke azar-kade men nuur ban jaati hai aag