Anand Narayan Mulla
kyuun na ho zikr mohabbat ka mare naam ke saath
umr kaaTi hai isi dard-e-dil-aram ke saath
mujh ko duniya se nahin apni tabahi ka gila
main ne ḳhud saaz kiya gardish-e-ayyam ke saath
ab vahi ziist men hai ye mire dil ka aalam
jaise kuchh chhuTta jaata hai har ik gaam ke saath
tujh se shikva nahin saaqi tiri sahba ne magar
dushmani koi nikali hai mire jaam ke saath
jo kare fikr-e-riha.i vahi dushman Thahre
uns ho jaa.e na taa.ir ko kisi daam ke saath
ziist ke dard ka ehsas kabhi miT na saka
sin ḳhushi ke bhi kaTe ik gham-e-be-nam ke saath
man-e-taqsir kahun davat-e-taqsir kahun
nigah-e-narm bhi hai garmi-e-ilzam ke saath
apni is aaj ki taqat pe na yuun itrao
mehr uTTha tha har ik sub.h-e-shab-anjam ke saath
main tujhe bhuul chuka huun magar ab bhi ai dost
aati jaati hai nigahon men chamak shaam ke saath
ab bhi kaafi hai ye har shor pe chhane ke liye
koi ulfat ki azaan de to tire naam ke saath
aa gaya ḳhatm pe sayyad tira daur-e-fusun
ab to daana bhi nahin hai qafas-o-dam ke saath
kaḳh-o-aivan yahi guzre hue dauron ke na hon
gard si aa.i hai kuchh daman-e-ayyam ke saath
main tira ho na saka phir bhi mohabbat main ne
jab bhi duniya ko pukara to tire naam ke saath
ḳhuld ujḌi hai to ab apne farishton se basa
ham se kya ham to nikale ga.e ilzam ke saath
hujra-e-ḳhuld hai hur-e-sharar-andam nahin
saqiya atish-e-rangin bhi zara jaam ke saath
zikr-e-‘mulla’ bhi ab aata to hai mahfil men magar
phiki tarif men lipTe hue dushnam ke saath
meri koshish hai ki sheron men samo duun ‘mulla’
sub.h ka hosh bhi divangi-e-sham ke saath
do kinaron ke huun mabain men ik pal ‘mulla’
rakhta jaata huun sutun ek har ik gaam ke saath
Leave a Reply