Iqbal Azeem
ab ise kya kare koi ankhon men raushni nahin
shahr bhi ajnabi nahin log bhi ajnabi nahin
ham ne ye soch kar kabhi jur.at-e-arz ki nahin
shikva ba-sad-ḳhulus bhi sheva-e-dosti nahin
yuun to baḌe ḳhulus se log hue hain ham-safar
raah men saath chhoḌ den un se ba.iid bhi nahin
pursish-e-hal ke siva koi kare bhi kya magar
pursish-e-hal dosto tanz hai dosti nahin
biite hue ḳhushi ke din bhuli hui kahaniyan
aap ko yaad hon to hon ham ko to yaad bhi nahin
Leave a Reply