Mujh Pe Aisa Koi Sher Nazil Na Ho

Sahba Akhtar

mujh pe aisa koi sher nazil na ho

jis ki hiddat mire ḳhuun men shamil na ho

fikr aise muhit-e-suḳhan ki karo

jis ki amvaj ka koi sahil na ho

aaj ik bint-e-maryam hai aghosh men

mujh pe ai ruh-e-quds aaj nazil na ho

be-muhaba mile hijr ho ba-visal

koi divar raste men maa.il na ho

shaḳh par hai guman gul se andesha hai

ye bhi ḳhanjar na ho ye bhi qatil na ho

karvan-e-junun de raha hai sada

jaan ho pyari jise ham men shamil na ho

kaash vo vaqt bhi aa.e duniya men jab

zar pukare magar koi saa.il na ho

meri tanha.i ko mera maqsum kar

meri manzil zamane ki manzil na ho

hukm de jan-e-‘sahba’ na.i fikr ka

ye ghazal bhi agar tere qabil na ho