Sufi
saba ko fikr hai kaaba naya banane ki
ki jama karti hai khaak un ke astane ki
falak ko zid hai nasheman mira mitane ki
chaman men dhun hai mujhe ashiyan banane ki
zamin pe lala-o-gul se hai ibtada-e-bayan
shafaq hai akhiri surkhi mire fasane ki
isi se niklega taamir ka bhi ik pahlu
zarur chahiye takhrib ashiyane ki
hazar jalva-e-be-rang sad mataa-e-nazar
nahin hai husn ko hajat naqab uthane ki
khula ye raaz ki thiin kis qadar fareb-e-nazar
ajal ke bhes men ranginiyan zamane ki
asiro kar lo nasheman ka akhiri matam
qafas men aai hai khaak ud ke ashiyane ki
suni thi vusat-e-duniya ki dastan ham ne
magar mili na jagah ashiyan banane ki
ye kah ke palte hain duniya ke dekhne vaale
ki ye jagah nahin vallah dil lagane ki
bana bahar men ujda khizan men ai ‘afqar’
haqiqat itni hi bas apne ashiyane ki
Leave a Reply