Ghulam Husain Sajid
din ke paikar men kahin raat men Dhalte hue rang
jaane rukte hain kahan niind men chalte hue rang
aḳhiri sham.a bujhate hue apne ghar ki
main dekhe the kisi taaq men jalte hue rang
us pari-zad ki ankhon men dikha.i denge
ek hi pal men ka.i rang badalte hue rang
sar uThate hain mire Dubte lahje men kahin
guftugu karte hue lafz ugalte hue rang
sub.h-dam ghar se nikalna hi agar paḌ jaa.e
niind se aankh churata huun masalte hue rang
haar aaya huun kisi a.ina-ḳhane men unhen
mere hamrah nahin aaj uchhalte hue rang
ik badalti hui duniya ke makin hain ‘sajid’
ḳhaak par girte hue aur sambhalte hue rang
Leave a Reply