Seemab Akbarabadi
nasim-e-sub.h gulshan men gulon se khelti hogi
kisi ki aḳhiri hichki kisi ki dil-lagi hogi
tujhe danista mahfil men jo dekha ho to mujrim huun
nazar aḳhir nazar hai be-irada uTh ga.i hogi
maza aa ja.ega mahshar men kuchh sunne sunane ka
zaban hogi hamari aur kahani aap ki hogi
yahi aalam raha parda-nashini ka to zahir hai
ḳhuda.i aap se hogi na ham se bandagi hogi
ta.ajjub kya lagi jo aag ai ‘simab’ siine men
hazaron dil men angare bhare the lag ga.i hogi
Leave a Reply