Razi Raziuddin
ab bhi usi tarah se ise intizar hai
ab bhi kisi ḳhayal se dil be-qarar hai
aati ḳhizan men bikhre hain murjha.e chand phuul
ujḌa hua chaman hai ye jaati bahar hai
yuun dil pe le liya hai ki tan ka na hosh hai
aur tan pe jo qaba hai to vo tar-tar hai
aahaT ho koi us ki taraf dauḌe jaate hain
taḳhir ek pal ki bhi ab dil pe baar hai
dil ko jala.e rakkha hai ham ne charagh sa
is ghar men ham hain aur tira intizar hai
Leave a Reply