Ruh Tak Aa Ki Mujhe Us Ka Sahaara Hai Bahut

Nivesh Sahu

ruuh tak aa ki mujhe us ka sahara hai bahut

jism mat chheḌ mujhe jism ne maara hai bahut

chand ki kis ko talab hai ki yahan tariki

is qadar hai ki mujhe ek sitara hai bahut

meri janib se sada aur sada aur sada

us ki janib se faqat ek ishara hai bahut

main huun ḳhvabon ki hava tu hai haqiqat ka charagh

paas hon donon to is men bhi ḳhasara hai bahut

is ka gham chhoḌ kahan kaise kaTi hijr men umr

vo ghaḌi soch jise saath guzara hai bahut

tu mira ḳhvab hai sardi ki kisi raat ka ḳhvab

sard hai jis men badan ruuh ka paara hai bahut