Khumar Barabankavi
sajdon ki rasm-e-kohan ko hosh ganva ke bhuul ja
sang-e-dar-e-habib par sar ko jhuka ke bhuul ja
ishq ko barqarar rakh dil ko laga ke bhuul ja
is se bhi mutma.in na ho us ko bhi pa ke bhuul ja
dil se taḌap juda na kar saaz ko be-sada na kar
dard jo ho fughan talab honTh hila ke bhuul ja
dard uThe uTha kare choT lage laga kare
kuchh bhi ho tu ba-nam-e-dost hans ke hansa ke bhuul ja
jam-ba-dast-o-mai-ba-jam yuun hi guzar sub.h-o-sham
ziist ki talḳhiyan mudam pi ke pila ke bhuul ja
manzil-e-ishq se guzar be-ḳhud-o-mast-o-be-ḳhabar
choT lage to uf na kar dil ko daba ke bhuul ja
guzre hue zamane ko yaad na kar kabhi ‘ḳhumar’
aur jo yaad aa hi jaa.e ashk baha ke bhuul ja
Leave a Reply