Ramesh Kanwal
zara zara si baat par vo mujh se bad-guman rahe
jo raat din the mehrban vo ab na mehrban rahe
juda.iyon ki lazzaton ki vus.aten nahin rahin
vo ḳhush-ḳhayal vasl ban ke mere darmiyan rahe
paheliyan bujhao mat bahane ab banao mat
yahin kahin nahin the tum batao phir kahan rahe
vo mere saath kab na the gila karun jo main bhala
zara zara si baat ka fuzul kyuun bayan rahe
na jhiil koi shahr men talayya-tal bhi nahin
ye lashkar-e-parind phir bata.iye kahan rahe
mohabbaten muravvaten lihaz ya ḳhulus ho
sabhi hain dar-ba-dar ki ab na in ke qadr-dan rahe
masarraton ki dhuup un ke flat men hai raat din
hamare gham ki bastiyon men karb-e-javedan rahe
zara zara si baat par bichhaḌ gaya jo be-sabab
ana va zid ki kashmakash men ham yahan vahan rahe
ye asman ki tirgi numa.ishon ki raushni
‘kanval’ tumhari raah men hamesha kahkashan rahe
Leave a Reply