Ejaz Asif
sada-e-ahd-e-vafa ko zaval kyuun aaya
lab-e-sukut pe harf-e-saval kyuun aaya
kise ḳhabar ki chaman men ḳhizan ki aamad par
ghurur-e-sho.ala-e-gul ko jalal kyuun aaya
bujha raha tha main apne vajud ka ḳhurshid
tiri nigah men rang-e-malal kyuun aaya
shab-e-firaq ne dekhi na thi miri surat
shab-e-firaq ko mera ḳhayal kyuun aaya
chubhan hai zehan men ‘asif’ ki is andhere men
ufuq ke haath pe aḳhir hilal kyuun aaya
Leave a Reply