suune suune se falak par ik ghaTa banti hui
dhire dhire us ki aamad ki faza banti hui
janm ka bas ek lamha aur ab ye zindagi
ik zara si baat baḌh kar mas.ala banti hui
qaid si lagne lagi hai mujh ko ye avargi
ab to azadi bhi meri ik saza banti hui
teri di har choT ik lazzat si hai mere liye
ab ye lazzat da.imi sa za.iqa banti hui
kar ga.i hai kis qadar masruf mujh ko dekhiye
meri sub.h-o-sham ka vo mashghala banti hui
hain sabhi TuuTe hue ye jaan paaya jab dukhi
meri ik TuuTi sada sab ki sada banti hui
ai mire saa.e mila hai jab se tujh sa ham-safar
raste ki har musibat rasta banti hui
tham chuki thi jab ki har halchal tiri yaad aa.i phir
zindagi ki sat.h par ik bulbula banti hui
meri ankhen hain abhi bhi is tilismi qaid men
is ki vo dhundli si surat ja-ba-ja banti hui
is jalan ke saath hi rahna hai ab ‘atish’ mujhe
jo miri zid thi kabhi ab vo ana banti hui
Leave a Reply