Ehsan Danish
mire miTane ki tadbir thi hijab na tha
vagarna kaun se din husn be-naqab na tha
agarche nazkash-e-esaghar-e-sharab na tha
ḳhumar-ḳhane men mujh sa koi ḳharab na tha
khula tilism-e-tamanna to khul gaya ye bhi
ki ik fareb-e-nazar tha tira shabab na tha
ḳhayal-e-dost tiri jalva-tabiyon ki qasam
jo tu na tha miri duniya men aftab na tha
tire firaq ki raten thiin is qadar maghmum
ki dagh-e-ḳhatir-e-mahzun tha mahtab na tha
bura ho nala-e-paiham ka kuchh dinon pahle
ḳhamosh raat ke dil men ye pech-o-tab na tha
nigah milte hi ghash kha ke gir paḌin nazren
thi ek barq-e-mushakkal tira shabab na tha
azal ke din se hain ham mast-e-jalva-e-saqi
hamare samne kis roz aftab na tha
kuchh apne saz-e-nafas ki na qadr ki tu ne
ki is rabab se behtar koi rabab na tha
dil-e-ḳharab ka ‘ehsan’ ab ḳhuda-hafiz
ḳharab tha magar aisa kabhi ḳharab na tha
Leave a Reply