Hasan Abbasi
ḳhvab apne miri ankhon ke havale kar ke
tu kahan hai mujhe nindon ke havale kar ke
mera angan to ba-juz tere mahakta hi nahin!
barha dekha hai phulon ke havale kar ke
ek gumnam jazire men utar ja.unga
apni kashti kabhi lahron ke havale kar ke
kaisa suraj tha ki phir lauT ke aaya hi nahin
chand taare miri raton ke havale kar ke
mujh ko ma.alum tha ik roz chala ja.ega!
vo miri umr ko yadon ke havale kar ke
ghar ki virani badal Daali hai raunaq men ‘hasan’
sahn ka peḌ parindon ke havale kar ke
Leave a Reply