mire safar men hi kyuun ye azaab aate hain
jidhar bhi ja.un udhar hi sarab aate hain
talash hai mujhe ab to unhin fazaon ki
jahan ḳhizan men bhi akasr gulab aate hain
kisi ko milta nahin ik charagh milon tak
kisi ki basti men sau aftab aate hain
na nikla kijiye raton ko ghar se aap kabhi
saḌak pe raat men ḳhana-ḳharab aate hain
khula makan hai har ek zindagi ‘azar’
hava ke saath darichon se ḳhvab aate hain
Leave a Reply