ai dost tiri baat sahar-khez bahut hai
par tarz-e-takallum tira khun-rez bahut hai
gum-sum sa khada hai koi darvaza-e-dil par
is shaam ka manzar to dil-avez bahut hai
mahfil men tire hone se hai rang pe mausam
ahval-e-khas-o-am tarab-khez bahut hai
ik shakhs jo uljha hai nai fikr-o-nazar men
vo sahib-e-khush-fahm hai aur tez bahut hai
jo baat tu kahta hai vahi baat ho shayad
lekin tiri ye baat gham-angez bahut hai
bhadke hue shoale hi mata-e-dil-o-jan hain
‘alam’ tire kuche men hava tez bahut hai
Leave a Reply