kahin saaqi ka faiz-e-am bhi hai
kisi shishe pe mera naam bhi hai
vo chashm-e-mast mai bhi jaam bhi hai
phire to gardish-e-ayyam bhi hai
nava-e-chang o barbat sunne vaalo
pas-e-parda baḌa kohram bhi hai
miri fard-e-junun pe ai baharo
gavahon men ḳhizan ka naam bhi hai
na puchho bebasi us tishna-lab ki
ki jis ki dastaras men jaam bhi hai
mohabbat ki saza tark-e-mohabbat
mohabbat ka yahi in.aam bhi hai
nigah-e-shauq hai gustaḳh lekin
nigah-e-shauq kuchh badnam bhi hai
nigahon ka tasadum kis ne dekha
magar ye raaz tasht az baam bhi hai
Leave a Reply