hansi chhupa bhi gaya aur nazar mila bhi gaya
ye ik jhalak ka tamasha jigar jala bhi gaya
utha to ja bhi chuka tha ajiib mehman tha
sadaen de ke mujhe niind se jaga bhi gaya
ghazab hua jo andhere men jal uthi bijli
badan kisi ka tilismat kuchh dikha bhi gaya
na aaya koi lab-e-bam shaam dhalne lagi
vufur-e-shauq se ankhon men khuun aa bhi gaya
hava thi gahri ghata thi hina ki khushbu thi
ye ek raat ka qissa lahu rula bhi gaya
chalo ‘munir’ chalen ab yahan rahen bhi to kya
vo sang-dil to yahan se kahin chala bhi gaya
Leave a Reply