Ajiz Matvi
kabhi ahl-e-mohabbat yuun na ḳhauf-e-jism-o-jan karte
agar shaiḳh-o-barahman jashn-e-naqus-o-azan karte
navazish kaash mujh par itni mere mehrban karte
kabhi dil ki tasalli ke liye bhule se haan karte
hamare jazba-e-tamir se hote agar vaqif
to sadiyon barq ke sho.ale tavaf-e-ashiyan karte
fasurda yuun na hote ghuncha-o-gul mausam-e-gul men
agar dil se chaman ki abiyari baghban karte
naved-e-fasl-e-gul aate hain dil apna taḌap uTTha
asir-e-gham hain varna ham bhi sair-e-gulistan karte
faza-e-sahil-e-ummid agar kuchh raas aa jaati
to ham kyuun nazr-e-tufan kashti-e-umr-e-ravan karte
hamen bhi mil gai hoti sanad manzil-shanasi ki
saliqe se agar taqlid mir-e-karvan karte
kabhi bad-e-saba ban kar kabhi jarub-kash ho kar
tamanna thi musalsal ham tavaf-e-astan karte
tha chup rahna hi behtar un ki bazm-e-naz men ‘ajiz’
koi gham-ashna hota to sharh-e-dastan karte
Leave a Reply