chale le ke sar par gunahon ki gathri
safar men ye hai ru-siyahon ki gathri
padi roz-e-mahshar vahin barq aa kar
jahan thi tire dad-khvahon ki gathri
musafir main us dasht ka huun ki jis men
luti kitne gum-karda-rahon ki gathri
jahan suus ne bahr se sar nikala
main samjha hai kashti tabahon ki gathri
kulah-e-zari mah-e-nau ne uda li
khuli thi kahin kaj-kulahon ki gathri
ham un sarqa valon men ai ‘mushafi’ hain
churate hain jo badshahon ki gathri
Leave a Reply