koi tasir to hai is ki nava men aisi
raushni pahle na thi dil ki faza men aisi
aur phir us ke ta.aqub men hui umr tamam
ek tasvir uḌi tez hava men aisi
jaise viran haveli men hon ḳhamosh charagh
ab guzarti hain tire shahr men shamen aisi
aankh masruf hai zambil-e-hunar bharne men
kis ne rakkhi hai kashish arz o sama men aisi
ulTi janib ko safar karne laga har manzar
sansani phail ga.i rah-e-fana men aisi
kahkasha.en bhi tahayyur se nikal sakti nahin
chhoḌ aaya huun ka.i nazren ḳhala men aisi
yahin aana hai bhaTakti hui avazon ko
ya.ani kuchh baat to hai koh-e-nida men aisi
Leave a Reply