Imran Badayuni
tujh ko dekha to ye laga hai mujhe
ishq sadiyon se janta hai mujhe
ashna saḌken ajnabi chehre
shahr men aur kya dikha hai mujhe
log qimat miri lagate hain
kis jagah tu ne rakh diya hai mujhe
sub.h ruḳhsat kare makan mera
shaam ko ḳhud hi DhunDhta hai mujhe
rat-jago tum hi kuchh batao ab
ishq to hai hi aur kya hai mujhe
main bhi kya dusron ke jaisa huun
ḳhud ko bahar se dekhna hai mujhe
baat sach hai magar kahun kaise
tishnagi ne Dubo diya hai mujhe
mauj-dar-mauj miT raha huun main
kaun sahil pe likh gaya hai mujhe
kis liye roz jaag jaata huun
kaun hai jis ka Dar laga hai mujhe
Leave a Reply